Mútur og hótanir á loftslagsráðstefnu SÞ
10/12/10 • Flokkur: Fréttir
„Klósettpappírinn er búinn. Eigum við nokkuð fleiri eintök af Kaupmannahafnarsamkomulaginu?“
Skjöl frá Wikileaks sýna fram á hvernig mútur og hótanir voru notuð af hálfu stórveldanna á loftslagsráðstefnu Sameinuðu þjóðanna í desember á síðasta ári, í þeim tilgangi að fá þróunarlönd til að samþykkja hið svokallaða Kaupmannahafnarsamkomulag (Copenhagen Accord). Sá samningur er álitinn af mörgum vera leið stórveldanna til að viðhalda nokkurn veginn óbreyttri stefnu í losun gróðurhúsalofttegunda og gæta hagsmuna stórfyrirtækja umfram hagsmuni almennings eða náttúru.
Einnig sýna skjöl Wikileaks fram á að stórveldin reyndu að sniðganga þjóðir sem reyndust þeim óþægur ljár í þúfu. Samkvæmt democracynow.org kemur fram í skjölunum að loftslagsfulltrúi ESB, Connie Hedegaard og ráðgjafi Hvíta hússins, Michael Froman, hafi hist og rætt það hvernig hægt væri að „vinna í kring um“ ósamvinnuþýðar þjóðir á borð við Venesúela og Bólivíu. Froman talaði þar um leiðir til að taka úr umferð, sniðganga eða fá til samvinnu þessi og önnur lönd líkt og Níkaragva, Kúbu og Ekvador. Stuttu síðar skáru Bandaríkin niður styrki til umhverfisverkefna í Bólivíu og Ekvador.
Einnig hefur vakið athygli eftir COP15 fundinn á síðasta ári, hvernig fulltrúar Maldív-eyja skiptu snögglega um skoðun og ákváðu að styðja Kaupmannahafnarsamkomulagið, þrátt fyrir að hafa áður lýst því yfir að þeir myndu hvergi hvika í afstöðu sinni á loftslagsráðstefnunni. Eins og þekkt er munu Maldív-eyjar verða meðal fyrstu fórnarlamba loftslagsbreytinga, haldi þær áfram með óbreyttum hætti. Þar til nú hefur ekki verið vitað hvað hafði þau áhrif að fulltrúar eyjanna ákváðu að breyta um afstöðu og styðja Kaupmannahafnarsamkomulagið en í skjölunum sem birt voru af Wikileaks kemur fram að Bandaríkin hafi boðið þeim tugi milljarða dala fjárhagsaðstoð fyrir að skrifa undir plaggið.
Nú í desember, ári eftir COP15, virðist sagan vera að endurtaka sig á 16. loftslagsráðstefnu SÞ, þar sem fulltrúar stórveldanna beita þróunarríkin þrýstingi til þess að þau fallist á hina viðskipta- og gróðamiðuðu leið Vesturlanda þegar kemur að lausn á loftslagsvandanum. Stórveldin þrýsta mjög á að Kaupmannahafnarsamkomulagið verði samþykkt sem löggilt plagg af Sameinuðu þjóðunum, en með því myndi það ná sambærilegri stöðu og Kyoto-bókunin. Fulltrúar ýmissa þróunarlanda telja aftur á móti að þetta muni þýða endalok Kyoto-bókunarinnar og þar með þess loforðs að ríkari lönd heims dragi stórlega úr losun gróðurhúsalofttegunda. Þess í stað muni markaðnum vera gefinn laus taumurinn til þess að halda áfram losun koltvísýrings og braski með loftslagsheimildir.
Sjá meira á:
